Salilungang Meuala Quing Camulangan

Manibat quing ibat, buri cu la reng mangacuiad a poesia. Poesiang gagamit ditac amanu oneng malaman, macabaldugan. Poesiang dirinan na cung maliualas a lugal nung nucarin maliaring mamialungan ing canacung panimanman.


Mainip cung mamasang mangacabang poesia lalus na nung balic-balic na mu ampo cucuentu na ing e gana-gana. Ala nang melacuan para quing mamasa. Balu cu naman a atin poesiang cailangan macaba. Anti na mo quing Inferno nang Dante. O caia ing Tarik Soliman nang John S. Manalili. Oneng deng aliuang atataquiran cu, pacacaba de pa andiang capaliari naman misulat macuiad.


Patungcul naman quing rima ampo sucad, ua, maniaman lang paquiramdaman deng macarima ampo masanting babasan patie macasucad. Anti cang duduian patie macanian ia pangacudta. Oneng para canacu, macasaua mu rin nung puru na mung macanian.


Ining Impun nang Apung Kragi Garcia ing mecaracap atensiun cu quing librung Tuglung. Aliu ia careng caraclan a ababasa cung cudtang Capampangan. Aliua ia porma, ala iang tequiquian rima o sucad. Mangacuaid a linia, ning minsan, metung mung amanu. Ditac a amanu, dapot asnang caracal reng larauan ampo capanandamang linto't memialung quing isip ampo pusu cu.


Macuiad oneng icua cu ing buong cuentu manibat quing minunang pamiquit anga quing pamicauani. Ing caiang pamanaus salilungan quing caiang palsintan agad nang minaplus quing canacung pusu. Tambing nilub quing isip cu ing Sanctuary nang Calla Lily at bala mu bigla queng dindam tinigtig cabang babasan que ing poesia.

"You are my light,

you are my home,

you are my sanctuary.

You are my peace,

you are my hope,

you are my sanctuary."

"Bayung pamalsinta.

Pamangaybugan mu kaya?"

Menaquit iang aliuang palsintan ania micasira la ning caiang salilungan? Ania meualan iang cabaldugan ing Impun? Ania macanita neng inari ing poesia?

"Mamulang ku.

Asnang kamulang!"

Oita ing masaquit quecatamung tau. Quing mumuna, asna tamung calalam lugud. Quing pamaglabas ning panaun at quinampa na ing mumunang silakbo ning capanandaman, ot anang calaguang manaquit baiung mamieng sigla't tula? Reng canitang mangalating bage a e naman taganang caiatu-atu, magui iang maragul a problema. Micucumpara ia quing pamanugali ning baiung palsintan. Tambing iang mitatambunan deng bagueng liguran tamu quing minunang palsintan pauli na namu ning licas a tula't lingapngap a darala ning baiung pamalsinta.


Ot e tamu dinan lingapngap ampo baiung sigla ing casalucuian a relasiun? Ot e tamu dinan oras ampo pusu ing pamanisip paralan ban canita ing sigla't tula e mimin? Ot mas dirinan tamung oras ing pamaniese't pamangambul quing baiung caquilalang balu tamu naman a maliaring muli quing pamalsinta? (Ot pilit tamung lalapitan ing api, ta gamu-gamo tamu?) Pamalsintang ali istu uling panasaquitan tamu capandaman at paglocuan tamu ing taung minunang minie tiuala't lugud quecatamu.


Casumangid na nini, atin macasambitlang, "geua cu ne ing egana-gana ba caming misalese oneng ala na taganang maliari, ala na ing respetu, ala na ing lugud." O e di, sulung! Micauani caiu pang masalese baiu manintun baiung sinta ban canita alang midamusac, alang maparalis.


Quing camatutuan, balu cung dacal pang mialiuang sangcan, mialiuang circumstances ania e tagana maliari ing micacauani. Ania atin at atin mumusbung macanian a relasiun. Nung sanang aiuasan, iuasan. Nung macapaglarin, larinan. Oneng aliua nang pisasabian ita quesa quing buri nang ipaiabut ning poesiang ini. Dapot taganang carin mu rin miras ing pisasabian a ini.


Ing masaquit, mipaquiapus tamu quing bida ning poesiang ini uling penusigan tamu ing caburian tamung mamialungan quing baiu ampo casalucuian a sinta, at quing catataluian aquit tamung ing tune lugud ia pin ing quecatamung impun at pamangaibugan mu pin ing quecatamung pipagtampison. Quing catataulian, tauli na pin man. Meaula ne ing quecatamung salilungan.


Camulangan pin.

Impun

nang Kragi Garcia

Impun.

Ika.

Salilungan.

Mumunang pamikit.

Timang mendatila.

Bakas namu.

Lalabul ing angin.

Mamagus ing danum.

Lumang dalit.

Bayung sunis.

Lawiwi ya naman.

Lagyu mu.

Sadyang mikaluguran.

Bayung pamalsinta.

Pamangaybugan mu kaya?

Panalala…

palibutan na

ing mayumu mung lupa.

Impun.

Alang kabaldugan.

Sadya.

Matwa ya mung impun.

Sagiwang panalala.

Ika.

Impun.

Buri kung sabyan.

Mamulang ku.

Asna kamulang!

Manibat iquit que ining cautasan aini quing librung Tuglung II, miabe ia careng paburitu cu. Balic-balican queng babasan, a-memorize cu ne pin iata e. Ngeni cu pa micasican lub isulat ing panandaman cu patie babasan que ini. Panupaia careng e mamaiun careng asambitla cu quing babo. Paganaca que mu pu, pansarili cu pung capandaman ian.