Cupidung Mulala

Maniampucaquing lugud. Macapangaplus careng pusung maua quing maiumung lugud.

Lugud a baual, lugud a alang cararasan. Lugud a macagulu, lugud a macasira.

"Nung magsilbi mu sa cacu iang calagan
Pusu mung mitali quilub ning pisamban"

Quing mumuna pang parapu, macalto nang talasaua ing daraunan nang lugud. Ot baquit pepaburen na pang lugud iang anti canini quing metung a taung baiu ne pa man aquilala, macatali na?

"Agaua cu caiang gamat mung tatarian
Aliua ing caia nuneyng cacung uanan
Mapaliari caia na cacu lang uman
Malutu mung labi a maiumu timan"

Caiumu na pin ning midadaun a lugud. Andiang ninung babai, siguradung mabalag. Pamitan a ablas a lugud, malaguang acamtan. Oneng ing mesabing babai, macatali ne. Ot pepaburen na pang magbusal ing queiang lugud?

Quing panaun iti, caracal a cuentu ning macanian, miraras pa e mu quing pamicauani da reng miasaua nune pati pangasira ning bie da reng anac ra. Atin mu naman a sinaguling milalaco quing uastung uisiu ania acacua rang apanasaquitan o apate reng carelang meliling cabangal quing bie.

Balu da nang ali ia macatuliran ing anti'tang situasiun, ot luban ia pa? Ot e na pa subucan larinan ing dapat larinan. Nung ala nang taganang solusiun, ot e na mu misabi, micasundu, desisiunan ing masaleseng pamicauani baiu luban ing panibaiung relasiun?

Sadia bang masaquit gulutan ing tucsu?

"Dapat ing catutuan ena mapalitan
E ca maguing cacu capilan man"

Miguising ne man pala quing catataulian. Simap. Oneng asnang calagua ing maniabi quesa quing daraptan. Pepaburen na neng lugud ia, e mu cabud mamanga. Malambat mu rin ing prosesu ning pamangalinguan. Masaquit at masaquit. O'bat pa casi pepainabu quing (balon o kaya ravine).

Saguli. Atin iatang mecalinguan.

Ana pa nitang luluguran? Lulugud ia naman caia queia? Ali man iata e. Pebalu ne caia? Nanu mo caia ing pequibat na?

Matinatinang mananaimic ing pamibie-bie, ot nanung misamutanan ia? Ing lulugud, megulu ia isip ampo pusu. Nung pepabaluan ne ing queiang luluguran, meistorbu ia naman - lulugud ia man o ali queia.

Maimung pangamanu. Maiumung lugud. Mulalang lugud.

Taganang i Cupidung aini, asnang capamuisit.



*****************

agaua cu caia
rodel gozum

Nung magsilbi mu sa cacu iang calagan
Pusu mung mitali quilub ning pisamban
Nung ing milabas sa agiu cung balican
Dacal la ring bague buri cung alilan.

Abalic cu caia danum a minagus
Maluat ng milayi quing daiat tinaglus
Ding aldo at bulan,banuang mengapupus
Magbalic la kaia nung iacu ing maus?

Agaua cu caiang melagas a bulung
Tunggal-tunggal balic quing sanga ding impun
Mapaliari caiang ing paspas ning alun
Balic co quing daiat pati na ing napun?

Agaua cu caia na icata mu pa
Ding micurus dalan baiu icong adua
Mapaliari caiang ing macabalu pa
Quing lagiu mu iacu at aliua ia sa?

Agaua cu caiang gamat mung tatarian
Aliua ing caia nuneyng cacung uanan
Mapaliari caia na cacu lang uman
Malutu mung labi a maiumu timan?

Agaua cu caiang cacu iang palitan
Ining misnang pait a casalucuian
Mapaliari caiang iacung quecang caulan
At cacu ilapat ing quecang catauan?

Agaua cu caiang iacu ing dinan mu
Quing tune mung lugud a paninapan cu
Maliari pa caiang iacung caiabe mu
Angga quing mapupus ing sabla quing iatu?

Dapot ing catutuan ena mipalitan
E cu na abalic ing mengalabasan
Dapat cung tanggapan ing casalucuian
E ca maguing cacu masqui capilan man.

Ca Rodel Gozum, aini ing comentu cu. Cuculitan mu cung mamie comentu careng angang cautasan mung papasquil mu quing dalig cu, oneng ali tamu naman apilit ing metung a taung mamie comentu nung ali ia bisa, e uari? Oneng ban canita ala na ca rugung asabi canacu, aini na. Mipacaba mu pin. E cu mag-critique uling e na cu man expert careng tecnicalidad da reng poesia. At e cu poeta, magsasa-poeta cu mu rugu. Ania ining sinulat cung ini, reacsiun que mu quing abasa cu. Quits ta na?